អេស្ប៉ាញ៖ តួលេខអ្នកស្លាប់បាត់បង់ជីវិតដោយសារឥទ្ធិពលរបស់ទឹកជំនន់នៅក្នុងប្រទេសអេស្ប៉ាញបានកើនឡើងដល់ចំ​នួន ២០៥នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន​ Channel News Asia នៅក្នុងថ្ងៃសៅរ៍ ទី២ ខែវិច្ឆិកា។ ទន្ទឹមគ្នានេះក៏មានពលរដ្ឋអេស្ប៉ាញជាច្រើននាក់ផ្សេងទៀតកំពុងតែបាត់ខ្លួនផងដែរ។ បើតាមអាជ្ញាធរអេស្ប៉ាញបានបញ្ជាក់ថា​ គិតត្រឹមពេលនេះអាជ្ញាធរនៅមិនទាន់អាចកំណត់ចំនួនអ្នកបាត់ខ្លួនទាំងអស់នោះឱ្យបានជាក់លាក់នៅឡើយទេ ហើយអ្វីដែលជារឿងគួរឱ្យបារម្ភបំផុតនោះគឺការបាត់ខ្លួនរបស់ពួកគេហាក់គ្មានតម្រុងនៃការតាមស្វែងរកទាល់តែសោះ ពោលគឺពួកគេទំនងជាបានកប់ជាប់នៅក្រោមគំនរអគារដែលបានបាក់ ឬបានហូរតាមទឹកទៅកាន់ទៅកន្លែងឆ្ងាយហើយ។ គួរបញ្ជាក់ជូនថា ទឹកជំនន់ដែលកំពុងវាយប្រហារប្រទេសអេស្ប៉ាញនៅពេលនេះគឺជាទឹកជំនន់ប្រកបដោយគ្រោះថ្នាក់ខ្លាំងបំផុតមួយ ដែលមិនធ្លាប់កើតមាននោះទេនៅក្នុងរយៈពេល​​ ៣០ឆ្នាំចុងក្រោយនេះ៕  អត្ថបទ៖ ភក្តី ប្រភព៖ Channel News Asia

អូស្រ្តាលី៖ ខណៈដែលឆ្នាំ២០២៥ នឹងខិតចូលមកដល់ក្នុងរយៈពេល ២ខែទៀតនេះ ពលរដ្ឋអូស្រ្តាលីបានត្រៀមស្វែងរកទិសដៅទេសចរណ៍សម្រាប់ធ្វើដំណើរកម្សាន្តជាបណ្តើរហើយៗ ដោយនៅក្នុងចំណោមទិសដៅទេសចរណ៍ទាំងអស់នោះ គឺខេត្តសៀមរាបបានក្លាយជាទិសដៅទេសចរណ៍ ដែលពលរដ្ឋអូស្រ្តាលីបានស្វែងរកនិងរំពឹងថាមកកម្សាន្តខ្ពស់ជាងគេបំផុតក្នុងចំណោមទិសដៅទេសចរណ៍ជាច្រើនទៀតទាំងនៅក្នុងតំបន់អាស៊ីនិងអឺរ៉ុបផងដែរ។ យោងតាមការចុះផ្សាយរបស់បណ្តាញសារព័ត៌មាន SBS News នៅក្នុងថ្ងៃសៅរ៍ ទី២ ខែវិច្ឆិកាបានបង្ហាញថា ក្នុងរយៈពេល ១២ខែចុងក្រោយនេះមានទិសដៅទេសចរណ៍ចំនួន ១០ ដែលមានការស្រាវជ្រាវនៅលើបណ្តាញអ៊ីនធឺណិតខ្ពស់បំផុតពីសំណាក់ពលរដ្ឋអូស្រ្តាលី ហើយខាងក្រោមនេះគឺជាចំនួនភាគរយនៃការស្វែងរកអំពីទិសដៅទេសចរណ៍ទាំងអស់នោះ ដែលបានកើនឡើងយ៉ាងខ្ពស់គួរឱ្យកត់សម្គាល់ បើធៀបទៅនឹងរយៈពេលកន្លងមក។ ទិសដៅទេសចរណ៍ទាំង ១០នោះ រួមមាន៖ ១. ខេត្តសៀមរាប ប្រទេសកម្ពុជា មានការស្វែងរកចំនួ​ន ៥២៩% ២. ខេត្ត Krabi ប្រទេសថៃ មានការស្វែងរកចំនួន ១៤១%

តៃវ៉ាន់៖ យ៉ាងហោចណាស់មានពលរដ្ឋតៃវ៉ាន់ចំនួន ២នាក់បានស្លាប់បាត់បង់ជីវិតដោយសារតែឥទ្ធិពលរបស់ព្យុះកង្រី (Kong-rey) នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃសុក្រ​ ទី១ ខែវិច្ឆិកា។ នៅក្នុងចំណោមអ្នកស្លាប់ទាំង ២នាក់នោះ មានជនរងគ្រោះម្នាក់អាយុ ៤៨ឆ្នាំ បានស្លាប់យ៉ាងអាណោចអាធ័មជាទីបំផុត ពោលគឺបង្គោលភ្លើងបានបាក់មកសង្កត់ពីលើគាត់ក្នុងអំឡុងពេលកំពុងជិះម៉ូតូលើដងផ្លូវ។ បើយោងតាមទីភ្នាក់ងារគ្រប់គ្រងគ្រោះមហត្តរាយតៃវ៉ាន់បានបញ្ជាក់ថា ក្រៅតែពីបានសម្លាប់មនុស្សអស់ចំនួន ២នាក់ ឥទ្ធិពលរបស់ព្យុះកង្រីក៏បានបណ្តាលឱ្យពលរដ្ឋតៃវ៉ាន់ជាង ៥០០នាក់ផ្សេងទៀតបានរងរបួសធ្ងន់និងស្រាលផងដែរ។​ ប្រភពខាងលើបានបន្តថា ទន្ទឹមគ្នានេះអាជ្ញាធរតៃវ៉ាន់ក៏កំពុងស្វែងរកមនុស្សចំនួន ៤នាក់ ដែលបានដើរឡើងភ្នំមុនពេលព្យុះកង្រីបានមកដល់ផងដែរ ហើយរហូតមកទល់នឹងពេលនេះគេនៅមិនទាន់បានដឹងថា ក្រុមអ្នកឡើងភ្នំទាំង ៤នាក់នោះអាចនឹងទៅដល់កន្លែងណា ឬស្លាប់រស់យ៉ាងណានោះទេ៕ អត្ថបទ៖ ភក្តី ប្រភព៖ Channel News

វៀតណាម៖ យ៉ាងហោចណាស់មានពលរដ្ឋវៀតណាមចំនួន ១២នាក់បានស្លាប់បាត់បង់ជីវិតដោយសារទឹកជំនន់ នេះបើយោងតាមការចុះផ្សាយរបស់បណ្តាញសារព័ត៌មាន VN Express នៅក្នុងថ្ងៃសុក្រ ទី១ ខែវិច្ឆិកា។ ទីតាំងដែលកំពុងរងការគំរាមគំហែងដោយទឹកជំនន់នៅពេលនេះគឺខេត្ត Quang Binh ស្ថិតភូមិភាគកណ្តាលនៃប្រទេសវៀតណាម ហើយទឹកជំនន់ប្រកបដោយគ្រោះថ្នាក់បានកើតឡើងដោយសារតែឥទ្ធិពលរបស់ព្យុះ Tra Mi។ ប្រភពខាងលើបានបន្តថា ក្រៅតែពីបានបណ្តាលឱ្យមានមនុស្សជាង ១០នាក់ត្រូវស្លាប់បាត់បង់ជីវិតហើយ ឥទ្ធិពលរបស់ទឹកជំនន់ខាងលើក៏បានបង្កឱ្យពលរដ្ឋវៀតណាមចំនួន ៧នាក់ផ្សេងទៀតត្រូវរងរបួស​ ផ្ទះជាង ៣៤,០០០ខ្នងបានរងនូវការបំផ្លាញ និងមានកប៉ាល់ចំនួន ៥គ្រឿងបានលេចផងដែរ។ ជាងនេះទៅទៀតទឹកជំនន់ក៏បានបណ្តាលឱ្យសត្វចិញ្ចឹមរបស់ប្រជាពលរដ្ឋវៀតណាមជាច្រើក្បាលត្រូវបាត់បង់ជីវិតផងដែរ ក្នុងនោះមានសត្វមាន់ទាជាង ៧០,៥០០ក្បាល សត្វគោក្របីជិត ៥០០ក្បាល កសិដ្ឋានចិញ្ចឹមត្រីទំហំ ៧១៦,៨ ហិចតាបានរងនូវការបំផ្លាញ ខណៈផ្ទៃដីកសិកម្ម ៧៩១,២ហិចតាក៏បានរងនូវការបំផ្លាញទាំងស្រុងផងដែរ៕

អេស្ប៉ាញ៖ តួលេខអ្នកស្លាប់បាត់បង់ជីវិតដោយសារឥទ្ធិពលរបស់ទឹកជំនន់នៅក្នុងប្រទេសអេស្ប៉ាញបានកើនឡើងដល់ចំ​នួន ១៥៨នាក់ហើយ នេះបើយោងតាមការចុះផ្សាយរបស់បណ្តាញសារព័ត៌មាន​ The Strait Time នៅក្នុងថ្ងៃទី១ ខែវិច្ឆិកា។ គិតត្រឹមពេលនេះភ្លៀងនៅបន្តធ្លាក់ខ្លាំងនៅតាមតំបន់ជាច្រើនក្នុងទីក្រុង Valencia ខណៈសម្ពស់ទឹកជំនន់បានថយចុះបន្ថិចហើយ។ បើតាមអាជ្ញាធរអេស្ប៉ាញបានបញ្ជាក់ថា បើទោះជាស្ថានភាពទឹកជំនន់ហាក់បានថយឥទ្ធិពលបន្តិចមែន តែគ្រោះថ្នាក់ផ្សេងៗនៅតែអាចបន្តកើនមានឡើង ហើយអាជ្ញាធរនៅមានការងារជាច្រើនដែលត្រូវដោះស្រាយជាបន្ទាន់។ ជាក់ស្តែងកាលពីថ្ងៃម្សិលមិញនេះ ក្រុមអ្នកជួយសង្គ្រោះបានជួយសង្គ្រោះជីវិតមនុស្សចំនួន ៨នាក់ចេញពីគំនរបាក់បែកបានយ៉ាងទាន់ពេលវេលាបំផុត ខណៈបើក្រុមអ្នកសង្គ្រោះទៅយឺតពេលតែបន្តិចនោះគឺពួកគេប្រាកដជាត្រូវស្លាប់មិនខាន។ គួរបញ្ជាក់ជូនថា ទឹកជំនន់ដែលកំពុងវាយប្រហារប្រទេសអេស្ប៉ាញនៅពេលនេះគឺជាទឹកជំនន់ប្រកបដោយគ្រោះថ្នាក់ខ្លាំងបំផុតមួយ ដែលមិនធ្លាប់កើតមាននោះទេនៅក្នុងរយៈពេល​​ ៣០ឆ្នាំចុងក្រោយនេះ៕  អត្ថបទ៖ ភក្តី ប្រភព៖ The Strait Time  

តៃវ៉ាន់៖ នៅក្នុងថ្ងៃព្រហស្បតិ៍ ទី៣១ ខែតុលានេះ អាជ្ញាធរតៃវ៉ាន់បានប្រកាសបិទក្រុងនិងស្រុកទាំងអស់ដោយសារតែការមកដល់របស់ព្យុះដ៏គ្រោះថ្នាក់មួយគឺព្យុះទីហ្វុង Kong-rey នេះបើយោងតាមការចុះផ្សាយរបស់បណ្តាញសារព័ត៌មាន The Strait Time។ ជាងនេះទៅទៀត អាជ្ញាធរតៃវ៉ាន់ក៏បានប្រកាសផ្អាក និងពន្យារពេលជើងហោះហើរទាំងក្នុងស្រុក និងអន្តរជាតិរាប់រយជើងផងដែរ ដើម្បីបង្ការគ្រោះថ្នាក់ផ្សេងៗដែលអាចកើតឡើងដោយយថាហេតុ។ បន្ថែមពីលើនេះទៀត ទីផ្សារហិរញ្ញវត្ថុរបស់តៃវ៉ាន់ដែលមានតម្លៃរាប់ពាន់លានដុល្លារ ក៏ត្រូវប្រកាសផ្អាកសកម្មភាពជាបណ្តោះអាសន្នសិនដែរ ពោល គឺត្រូវផ្អាកសកម្មភាពរហូតដល់មានការជូនដំណឹងជាថ្មីពីអាជ្ញាធរតៃវ៉ាន់។ បើតាមទីភ្នាក់ងារឧតុនិយមតៃវ៉ាន់បានព្យាករណ៍ថា ព្យុះទីហ្វុង Kong-rey នឹងធ្វើដំណើរមកដល់កោះតៃវ៉ាន់នៅម៉ោង ២រសៀលថ្ងៃនេះ ហើយវាគឺជាព្យុះដ៏គ្រោះថ្នាក់ដែលមិនធ្លាប់កើតមាននោះទេនៅក្នុងរយៈពេល ៣០ឆ្នាំចុងក្រោយនេះ ខណៈឥទ្ធិពលរបស់ព្យុះនឹងបង្កឱ្យមានភ្លៀងធ្លាក់អមដោយខ្យល់បោកបក់យ៉ាងខ្លាំង ជំនន់ទឹកភ្លៀង និងបញ្ហាបាក់ដីផងដែរ៕ អត្ថបទ៖ ភក្តី ប្រភព៖ The Strait

អេស្ប៉ាញ៖ យ៉ាងហោចណាស់មានមនុស្សចំនួន ៩៥នាក់​បានស្លាប់បាត់បង់ជីវិតដោយសារទឹកជំនន់ដ៏កម្រមួយនៅក្នុងប្រទេសអេស្ប៉ាញ នេះបើយោងតាមការចុះផ្សាយរបស់បណ្តាញសារព័ត៌មាន Channel News Asia នៅក្នុងថ្ងៃព្រហស្បតិ៍​ ទី៣១ ខែតុលា។ សូមបញ្ជាក់ជូនថា ទីតាំងដែលកំពុងរងការគំរាមគំហែងដោយទឹកជំនន់នៅពេលនេះគឺក្រុង Valencia ដែលជាសហគមន៍ស្វយ័តមួយមានពលរដ្ឋកំពុងរស់នៅប្រមាណជា​ ៥លាននាក់។ បើតាមអាជ្ញាធរអេស្ប៉ាញបានបញ្ជាក់ថា ទឹកជំនន់ដែលកំពុងបង្កការគំរាមគំហែងនៅពេលនេះគឺជាទឹកជំនន់ដ៏កម្រមួយដែលមិនធ្លាប់មានកើតមានៅអេស្ប៉ាញនោះទេក្នុងរយៈពេល ៣ទសវត្សរ៍ចុងក្រោយនេះ។ ប្រភពខាងលើបានបន្តថា ឥទ្ធិពលរបស់ទឹកជំនន់ក៏បានបំផ្លាញទ្រព្យសម្បត្តិរបស់ប្រជាពលពលរដ្ឋនិងទ្រព្យសម្បត្តិសាធារណៈអស់មួយចំនួនដែរ ដូចជារថយន្ត ផ្ទះ ស្ពាន និងអគារមួយចំនួនផងដែរ។ គិតត្រឹមពេលនេះឥទ្ធិពលរបស់ទឹកជំនន់នៅមិនទាន់ថយចុះនៅឡើយទេ ខណៈតួលេខជនរងគ្រោះត្រូវបានគេរំពឹងថា អាចនឹងបន្តកើនឡើងខ្ពស់ជាងនេះ៕ អត្ថបទ៖ ភក្តី ប្រភព៖ Channel News Asia

កូរ៉េខាងត្បូង៖  កូរ៉េខាងជើងបានត្រៀមរួចរាល់ហើយក្នុងការបាញ់សាកល្បងមីស៊ីលផ្លោងអន្តរទ្វីប (ICBM) ក្នុងថ្ងៃបោះឆ្នោតជ្រើសរើសប្រធានាធិបតីនៅអាមេរិក នេះបើយោងតាមការលើកឡើងរបស់សមាជិកសភាកូរ៉េខាងត្បូងម្នាក់ ដែលត្រូវបានចុះផ្សាយបន្តដោយបណ្តាញសារព័ត៌មាន The Strait Time នៅក្នុងថ្ងៃពុធ ទី៣០ ខែតុលា។ សមាជិកសភារូបនេះមានឈ្មោះថា Lee Seong-kweun ហើយការថ្លែងខាងលើនេះត្រូវបានធ្វើឡើងក្នុងអំឡុងពេលដែលលោកបានផ្តល់បទសម្ភាសន៍ជាមួយមន្ត្រី​ទីភ្នាក់ងារ​ស៊ើបការណ៍​សម្ងាត់​ការពារជាតិ (DIA) ក្នុងទីក្រុងសេអ៊ូល។ បើតាមលោក Lee Seong-kweun បានបញ្ជាក់ថា ការបាញ់មីស៊ីលផ្លោងអន្តរទ្វីប (ICBM) របស់កូរ៉េខាងជើងនៅសប្តាហ៍ក្រោយនេះគឺត្រូវបានធ្វើឡើងដើម្បីបង្ហាញកម្លាំងយោធានិងភាពរីកចម្រើនក្នុងវិស័យនុយក្លេអ៊ែររបស់ខ្លួន ចំថ្ងៃដែលមនុស្សជាច្រើនកំពុងមានការចាប់អារម្មណ៍ទៅលើការបោះឆ្នោតជ្រើសរើសប្រធានាធិបតីអាមេរិក ដែលជាព្រឹត្តិការណ៍ដ៏ធំនិងសំខាន់បំផុតមួយសម្រាប់ពិភពលោកទាំងមូលផងដែរ។ សូមបញ្ជាក់ជូនថា តាមគម្រោងគឺការបោះឆ្នោតជ្រើសរើសប្រធានាធិបតីអាមេរិកនឹងត្រូវធ្វើឡើងនៅក្នុងថ្ងៃទី ៥ ខែវិច្ឆិកា សប្តាហ៍ក្រោយនេះ៕ អត្ថបទ៖ ភក្តី ប្រភព៖ The Strait Time

វៀតណាម៖ តុលាការវៀតណាមបានកាត់ទោសមនុស្ស ៦នាក់ឱ្យជាប់ពន្ធធនាគារក្នុងរយៈពេលផ្សេងៗគ្នានៅក្នុងករណីមានភ្លើងឆេះខារ៉ាអូខេមួយកន្លែង ដែលបានបណ្តាលឱ្យមានអ្នកស្លាប់បាត់បង់ជីវិតចំនួន ៣២នាក់ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី៣០ ខែតុលា។ គួររម្លឹកជូនថា ហេតុការណ៍មានភ្លើងឆេះខារ៉ាអូខេនេះបានកើតឡើងតាំងពីឆ្នាំ ២០២២ម្លេះ ខណៈហេតុការណ៍គ្រោះថ្នាក់ដ៏កម្រនេះបានធ្វើឱ្យអាជ្ញាធរសម្រេចចុះត្រួតពិនិត្យអំពីប្រព័ន្ធសុវត្ថិភាពអគ្គីភ័យនៅតាមហាងខារ៉ាអូខេរាប់ពាន់កន្លែងនៅក្នុងប្រទេសវៀតណាម។ ប្រភពខាងលើបានបន្តថា នៅក្នុងចំណោមអ្នកដែលត្រូវទទួលទោសទាំង ៦នាក់នោះរួមមាន ម្ចាស់ហាងខារ៉ាអូខេម្នាក់ ដែលត្រូវផ្តន្ទាទោសឱ្យជាប់ពន្ធធនាគាររយៈពេល ៨ឆ្នាំ  អ្នកម៉ៅការសាងសង់ខារ៉ាអូខេម្នាក់ ដែលត្រូវផ្តន្ទាទោសឱ្យជាប់ពន្ធធនាគាររយៈពេល ៥ឆ្នាំ និងមន្ត្រីប៉ូលីសចំនួន ៤នាក់ ដែលពួកគាត់ម្នាក់ៗត្រូវផ្តន្ទាទោសឱ្យជាប់ពន្ធធនាគារក្នុងរយៈពេលចន្លោះពី ៤ឆ្នាំ ដល់ ៧ឆ្នាំកន្លះ។ សូមបញ្ជាក់ជូនថា មនុស្សទាំង ៦នាក់នេះសុទ្ធតែត្រូវទទួលទោសពីបទបំពានច្បាប់ការពារអគ្គីភ័យនិងមានការធ្វេសប្រហែសក្នុងពេលបំពេញភារកិច្ចរៀងៗខ្លួនៗ ហើយដោយសារពួកគាត់មានភារកិច្ចនិងការទទួលខុសត្រូវផ្សេងគ្នា

អាហ្សង់ទីន៖ យ៉ាង​ហោចណាស់មានម​នុស្សម្នាក់បានស្លាប់បាត់បង់ជីវិតនៅក្នុងហេតុការណ៍បាក់សណ្ឋាគារមួយកន្លែងនៅក្នុងប្រទេសអាហ្សង់ទីន នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃពុធ ទី៣០ ខែតុលា។ សណ្ឋាគារដែលជាកន្លែងកើតហេតុនោះមានឈ្មោះថា Dubrovnik ស្ថិតនៅក្នុងតំបន់រមណីយដ្ឋាន Villa Gesell ខណៈហេតុការណ៍បាក់នេះបានកើតនឡើងនៅពាក់កណ្តាលយប់នៃយប់ថ្ងៃទី ២៩ ឆ្លងចូលថ្ងៃទី ៣០ ខែតុលានេះ។ ប្រភពខាងលើបានបន្តថា ភ្លាមៗក្រោយសណ្ឋាគារបានបាក់គឺគេបានរកឃើញសាកសពបុរសវ័យខ្ទង់ ៨០ឆ្នាំម្នាក់នៅក្បែរគំនរបាក់បែក ខណៈអត្តសញ្ញាណរបស់ជនរងគ្រោះរូបនេះមិនមានការបញ្ជាក់នោះទេ។ បើតាមអាជ្ញាធរអាហ្សង់ទីនបានបញ្ជាក់ថា ក្រៅតែពីបានបណ្តាលឱ្យមានអ្នកស្លាប់បាត់បង់ជីវិតហើយ ហេតុការណ៍អកុសលនេះក៏បានបណ្តាលឱ្យមនុស្សចំនួន ៩នាក់ផ្សេងទៀតកំពុងតែបាត់ខ្លួនផងដែរ ហើយរហូតមកទល់នឹងពេលនេះប្រតិបត្តិការណ៍ស្វែងរកជនរងគ្រោះនៅក្រោមគំនរបាក់បែកកំពុងធ្វើឡើងយ៉ាងយកចិត្តទុកដាក់បំផុត៕ អត្ថបទ៖ ភក្តី ប្រភព៖ The Strait Time